أهلا وسهلا بك زائرنا الكريم، إذا كانت هذه زيارتك الأولى للمنتدى، فيرجى التكرم بزيارة صفحة التعليمـــات، بالضغط هنا.كما يشرفنا أن تقوم بالتسجيل بالضغط هنا إذا رغبت بالمشاركة في المنتدى، أما إذا رغبت بقراءة المواضيع والإطلاع فتفضل بزيارة القسم الذي ترغب أدناه.
على بابا... والذئب كان يا مكان في قديم الزمان يعني تقريبا عام 875674 قبل الميلاد بنيه مسكينه ومصخمه اسمها ((رسميه)) عمرها 21 سنه و 14 شهر وعايشه ويه مره ابوها الي مات قبل 64 سنه! وياهم بنات مره ابوها ((شكيبه وهاشميه)) الي خلفتهم مرة ابوها وهي باستراليا وجانوا عايشين بمزرعه بجبل وجان بالمزرعة ذئب جبير ..جبير ... جبير كلش (بديت اخاف اني) وجان ورا سياج المزرعه وتحديدا بالوادي عجوزة عايشه وحدها فراح الذئب للعجوزة ودك الباب : دك ... دكدك .. دك ..دكدك (مؤثرات صوتيه اسم الله عليكم) كالت العجوز بصوت ضعيف ومتقطع ((مثل شبكة ؟؟؟؟؟؟)) منوووووو ؟؟؟ رد الذئب : منو يعني قابل ؟؟ ليلا مثلا!! اكيد اني الذئب افتحي الباب خلصيني لا تسويها هوسه فتحت العجوزه الباب كبل جيت الذئب عليها -لاتخافون- هجم عليها وحضنها ودك بوس !! غير طلعت العجوزه هي الي مربيته من هو وصغير يعني طلعوا اصدقاء من زمان من ايام الروضه ومثلوا باكثر من قصه اخر قصه الهم ((الذئب والحاسه السادسه من منظور العجوزة على سور الحديقه)) المهم كعدوا يسولفون كل واحد منهم بيده كلاص جاي -الذئب : سمعتي يا حجيه شنو صاير بالقريه؟ -العجوزه: لا شكوووووووو شصاير -الذئب : الحفله الي مسويها ابنج عوض السادس عشر مختار القريه -العجوزه: يا حفله هذي ان شاء الله مسويها بقاعه ! -الذئب : اي هاي الحفله -العجوزه: لا ما اعرف عنها اي شي -الذئب : حفله وعازم عليها كل العاطلين عن العمل وكل اهل الجنابر والي يبيعون بالترفك -العجوزه: اكيد ورا الحفله امه الثانيه! حتى يتزوج -الذئب : بس خافي يتزوج وحده تضحك عليه لانهم كلهم طماعين -العجوزه: بهاي حقك لان منو مو طماع بعوض ؟ -الذئب : اكو وحده اسمها رسميه -اذا نسيتوها ارجعوا لبدايه القصه- فقيره وبت حلال وام بيت تعرف تسوي كيك مو طبيعي!! -العجوزه: بس هاي رسميه شيجيبها على هيج حفله وهي طول الليل مشغوله بالتلفوون ويه سمير ((اي يعلم الله سمير الزوج رقم شكد )) وفي هذه الاثناء اكو ساحره اسمها (صمبوخه) واكفه ورا الحايط شوفو شعدها وشنو تسوي هناك - لو تدور على الف واكع منها بالقصه السابقه لو تدور بالزباله - المهم هاي الساحره مثلها مثل النسوان لازكه اذنها بالحايط وسمعت الحمار كله قصدي الحوار كله المهم تروح الساحره تشخط(تسحر) نفسها لبزونه بس تعبانه وجوعانه وذيلها مكصوص مع انها في الواقع ملكة جمال ولبسها كله من باريس ولندن اروح فدوه لصمبوخة تخبل بس المؤلف (لي هوة اني) يعجبه تصير بزونه تعبانه وتروح هاي البزونه الي هية صمبوخه - لبيت رسميه وكدام الباب تصيح ميو...ميآآآو...ميوو....ميآآآوو... عو..عو ((العو للتمويه)) تطلع رسميه تكول يااا خطيه هاي البزونه مسكينه وتجيبلها اكلها -الي حضرناه قبل القصه وحسب الاتفاق مع الساحره صمبوخه- حليب نيدو قليل الدسم و3 قطع بسكت وتبدي توكلها وتكول مسكينه هاي البزونه يعتني بيها
وراها تكول لا اني المسكينه الي محد يديرلي بال ولا ياخذني مثل بنات مره ابوي شكيبه وهاشميه على الحفله الي مسويها عوض-وتسبل عيونها من تكول عوض- بهاي اللحظه تتحول البزونه الى الساحره صمبوخه الجميله وتسولف لرسميه -طبعا بعد ما تصحيها من الصدمه مو لان تحولت من بزونه لساحره لا لانها انصدمت بجمال صمبوخه وكبت الغيره- تكول الها (لرسميه) شبيك لبيك سحري وجمالي فدوه لعيونج -يا عيني شكد مضحيه هاي الساحره (اكيد مخبله)- وتحول رسميه لبنيه حلوه كلش و تصعدها عربانه تجرها ثلاث حصونه ومطي وكيا 11 راكب وفيل يطير لونه وردي واذاناته كبار وتروح رسميه للحفله وبالحفله عوض واكف على الطابق الرابع ج -شو هو صف- قصدي الرابع بدون ج ويلوح بيديه للحضور (مثل ما كلنا فوك همة منو) وتفوت رسميه وينلصم ويتخبل عوض بجمال رسميه الي هوة اكيد من ورا تضحيه صمبوخة الساحره الحبابه وينزل على الدرج ركض ومسرعا اسراعا شديدا (شلوني بالفصحى )ويتزحلك بكشر موزه صومالي قد رماها احد المعازيم ((الي هو علي بابا)) ويوكع على راس وينفشخ ويموت!! اخ اني الي رح اموت من الكتابه ويجي علي بابا صياد الذئاب هذا الدور الي اخذه بعد قصه على بابا والاربعين حرامي و جاي على هاي القصه يدور على الذئب ولكن بعد ما وكع عوض وانفشخ بسببه ومات وبعد ما يعرف انه الذئب جان يريد يساعد رسميه يحس بالذنب وبعتزل ممارسه الصيد وبفتح محل للتصوير مع الخضراوات والفواكه النادرة مثل الكرفس والبيتنجان والبرتقال والفراوله واحيانا الطماطه !! وخلصت القصه ويستفاد من القصه العبر التاليه :- اولا : حتى الذئاب المتوحشه لها قلب طيب -بس اني ما مسؤول عن هذا الخريط - ثانيا : حلو نضحي بس تكون التضحيه لواحد يستاهل ثالثا: كل شي مقدر وكتوب رابعا: كلام الليل يمحوه النهار -خاصه التلفونات- والدليل رسميه راحت للمرحوم عوض و سمير انضرب جلاق خامسا: الكاتب من يضوج يلعب طوبه بالقصه !! القصه مستوحاه من قصه ليلى والذئب وقصه على بابا والاربعين حرامي وغيرها من القصص
اللهم آتنا في الدنيا حسنة وفي الآخرة حسنة وقنا عذاب النار . اللهم إني أعوذ بك من الفقر ، والقلة والذلة وأعوذ بك من ان أَظلِم أو أُظلَم . يامقلب القلوب ثبت قلبي على دينك.
اللهم آتنا في الدنيا حسنة وفي الآخرة حسنة وقنا عذاب النار . اللهم إني أعوذ بك من الفقر ، والقلة والذلة وأعوذ بك من ان أَظلِم أو أُظلَم . يامقلب القلوب ثبت قلبي على دينك.
علي بابا...والذئب
موضوع: علي بابا...والذئب
موضوع: رد: علي بابا...والذئب 
